Movie Box

ساعي البريد
انتاج ايطالي للعام 1994

الفلم عبارة عن رحلة بعالم الشعر و الاحاسيس والعشق….
الشاعر التشيلي المعروف بابلو نيرودا …و بأثناء فترة من الابعاد القسري بسبب مواقفه السياسية
ليهرب لأيطاليا ويعيش بأحد جزرها الجميلة بيستوحي كاتب الفلم هالئصة الرونانسية بالوقت يلي المشاهد رح يستمتع بقصائد نيرودا كمان
.
قصة الفلم بتحكي عن شخص بهالجزيرة بيمثل نموذج للانسان البسيط والعفوي بالكاد بيئدر يقرا و يكتب و ولهالسبب تم اختياره لتوصيل البريد لشخص واحد كحاله خاصة و هو الشاعر المبعد نيرودا
خلال عملية التوصيل اليومي بين ساعي البريد و الشاعر المنعزل …..بتنشأ علاقة مهمة بين هالشخصتين المتناقضتين من حيث كمية المعرفة و الثقافة , بس الشي يلي رح يجمعهن اكيد هو الحس العالي المرهف بيناتهن …والعفوية بالشخصية يلي رح تساعد ساعي البريد على تعلم الشعر و تعلم امور تاينة رح تغير حياته بالكامل …..
والاهم من هيك انو الحس الشعري رح يساعده بشكل كبير ليفوز بقلب الانسانه يلي بيحبها ,
و متل ما علق احد المهتمين على الفلم انه لازم اي شخص عاش علاقة حب بحياته يشوف هالفلم..
بعطيه 8 /10
الفلم من اخراج :
Michael Radford
و كتابة :
Pablo Neruda (poems)
Anna Pavignano (writer)

الفلم الايطالي يلي انعمل عام 2000 و هو من انتاج امريكي ايطالي
بيلخص ببساطة روعة السينما الايطالية و براعتها

حسناء الشاشة الفضية ….مونيكا بيللوتشي بأروع ادوارها بلا منازع

الفلم ببساطة بيحكي عن شاب بأول فترة مراهقته يعشق سيدة حسناء (مالينا)بقرية ايطالية بصقلية لحد تغير فيه كل حياته

مالينا هي اكيد اجمل امراة بالقرية بل قد تكون الامرأة الجميلة الوحيدة فيها
وهاد بيخليها حديث القرية كلها و مصدر الاشاعات و النميمة …غير معاناتها من حسد كل نساء القرية و محاولة كل الرجال النيل منها

و الامور رح تصير اسوء لما زوجها بيغادر للمشاركة بالحرب و بتضل مالينا مع والدها الهرم المدرس بهالقرية وحيدة
…
و الغريب بالقصة انو هالشاب اليافع هو الوحيد يلي بيفهم مالينا و بيقدر العمق الانساني لشخصيتها اكتر من كل سكان هالقرية
والفلم بيورجينا بصراحة كيف الحسد والحقد يمكن يدمرو اي انسان
الفلم اكتر من رائع …بتلعب فيه مونيكا بيلوتشي دور قليل الحوار بس بكتير براعة باداء الملامح و لغة الجسد …..
الفلم بعطي تسعة من عشرة و يمكن يكون انظلم
بفضل من الكل يحضروه باللهجة الايطاليه مع الترجمة المناسبة

من اخراج و كتابة
Giuseppe Tornatore
و بطولة:
Monica Bellucci

Note : ++ 18
و اكيد الفلم ترشح لكتير جوائز اهمها
_ اوسكار :افضل فلم …افضل موسيقى تصويرية
_ الغولدين غلوب :افضل فلم ناطق بغير الانكليزية و افضل صورة
_ جائزة الفلم الاوروبي:افضل ممثلة (مونيكا بيللوتشي) و افضل مخرج
بعتذر عن الاطالة بالشرح بس الفلم فعلن بيستحق
رح اختم بس الكوتس يلي ختم فيها بطل الفلم و عاشق مالينا باخر جملة فيه
Time has passed, and I have loved many women. And as they’ve held me close, and asked if I will remember them, I’ve said, “Yes, I will remember you.” But the only one I’ve never forgotten is the one who never asked… Malena.

الفلم الالماني الاشهر بالعقود الاخيرة …و يلي اعتبره احد النقاد الالمان افضل افلام العنف و الاثارة الالمانية على الاطلاق, بيتميز بشيء بسيط جدا…..هو انو كل شي في مبدع و غريب …..من طريقة سرد الاحداث ,لاسلوب الاخراج ,لاسلوب دمج الافكار فيه بكل الطرق

الفلم بتدأ احداثه باتصال هاتفي من ماني وهو عضو بعصابة تهريب الماس للشخص الوحيد يلي بيهتم فيه ,ويلي بيوثق و بيعتمد عليه..وهي البنت يلي على علاقة حب معها .. لولا

ماني بيخبر لولا بالاتصال انو بالغلط ضيع مبلغ من تهريبة الالماس هو 100 الف مارك الماني المفروض تسليمهم لرئيس العصابة .وهالمبلغ لازم يتسلم خلال عشرين دقيقة والا ماني رح ينقتل بدم بارد من قبل العصابة يلي من الممكن تقتل اي شخص بيسرق منها قنينة بيرة
.

طبعا بتحاول لولا توصيل فكرة استحالة جمع هالمبلغ خلال هالفترة القصيرة بس ماني بيذكر لولا بعبارة انو الحب من الممكن يصنع اي شيء

…….رح نشوف هون ب 3 مشاهد كل واحد فيهن 20 دقيقة حقيقة كيف لولا رح تجري بأسرع ما عندها حتى تجمع المبلغ …..و كيف بكل مرة تأخيرها لثواني او اجزاء من الثانية من الممكن انو تنقلب الاحداث بشكل دراماتيكي اكيد المشاهد رح يتفاجئ فيه بشكل مدهش

الفلم رح يغلب فيه طابع حماسي كبير ..بالذات انو لولا رح تركض بالفلم باسرع ما عندها باسلوب غاية بالاندفاع والحماس والرشاقة ..بيتصاحبو مع موسيقى تصويرية بتخلي المشاهد من الحماسة كأنو عميتفرج على مباراة او منافسة رياضية ضمن قصة حب بتعكس الاخلاص الكبير و الاهتمام يلي بتكنه لولا لحبيبها

الفلم ببساطة فينا نقول عنه مدهش ..بل انو اعتبره البعض تحفة سينمائية جديدة

الفلم تحت ادارة المخرج :
Tom Tykwer
يلي عمل افلام متل :
Heaven - Perfume (a story of a murderer )
و من بطولة :
Franka Potente (Lola)
Mortiz Blebteu (Mani)
الفلم من 80 دقيقة باللغة الالمانية ,وانعمل منه دوبلاج للغات : الفرنسية و الانكليزية و اليابانية
طبعا الفلم ترشح و نال كتير جوائز عالمية صعب نذكرها كلها.